பெற்றோருக்கு நீங்கள் பணிவுள்ள மகனாக/மகளாக இருக்கிறீர்களா? உங்களை நீங்களே மதிப்பிடுங்கள்.
நீங்கள் பெற்றோருக்குப் பணிவுள்ள மகனாக/மகளாக இருக்கிறீர்களா இல்லையா என்பதை உங்களில் ஒருவர் மதிப்பிடுவதற்கு சில அறிகுறிகள் உள்ளன.
நல்ல மகன்/மகள் (பர்) என்பதன் அறிகுறிகள்:
1- பெற்றோருடன் பேசும்போது அல்லது பழகும்போது மரியாதையாக நடத்தல்.
2- அவர்கள் நன்மையான காரியங்களை ஏவினால் அவர்களுக்குக் கீழ்ப்படிதல். அவர்கள் பாவம் செய்ய ஏவினால், இந்தக் கட்டத்தில் கீழ்ப்படியாமை குற்றமாகாது.
3- அவர்களின் தேவைகளைக் கவனித்து, அவர்களைப் பராமரித்து, சேவை செய்தல். ஏனெனில் அவர்களுக்குச் சேவை செய்வது உங்களைச் சுவர்க்கத்திற்கு நெருக்கமாக்கும். ஹமீத் கூறினார்: "(இயாஸ் இப்னு முஆவியாவின்) தாய் இறந்தபோது, அவர் அழுதார். அவரிடம், 'ஏன் அழுகிறீர்கள்?' என்று கேட்கப்பட்டது. அவர் கூறினார்: 'எனக்குச் சுவர்க்கத்திற்கு இரண்டு திறந்த வாசல்கள் இருந்தன, அவற்றில் ஒன்று அடைக்கப்பட்டுவிட்டது.'"
4- பெற்றோர் உயிருடன் இருக்கும்போது, அவர்களுக்கு நீண்ட ஆயுள், ஆரோக்கியம் மற்றும் நலம் கிட்ட வேண்டும் என்று பிரார்த்திப்பது. அல்லது, அவர்கள் இறந்து விட்டால், அவர்களுக்குப் பாவமன்னிப்பும் ரஹ்மத்தும் கிட்ட வேண்டும் என்று பிரார்த்திப்பது. ஒரு நபித்தோழர் கூறுகிறார்: "பெற்றோருக்காகப் பிரார்த்தனை செய்வதை விட்டுவிடுவது பிள்ளையின் வாழ்வாதாரத்தைக் குறைத்துவிடும்."
5- அவர்களுக்குத் தேவைப்படும்போது நிதி உதவி செய்தல் மற்றும் பண்டிகைகள் போன்ற சந்தர்ப்பங்களில் அவர்களுக்குப் பரிசுகள் வழங்குதல்.
6- அவர்கள் வயதானவர்களாக இருந்தாலும் சரி, இளையவர்களாக இருந்தாலும் சரி, அவர்களுக்கு சிகிச்சை வழங்குவதில் விரைவாக இருப்பது, மருந்துகளை வழங்குவது மற்றும் சிகிச்சைத் திட்டத்தின்படி அவர்களை கண்காணிப்பது ஆகியவை இதில் அடங்கும். ஸயீத் பின் ஆமிர் கூறினார்: "என் சகோதரன் உமர் இரவு முழுவதும் தொழுதார், நான் என் தாயின் கால்களைத் தடவினேன், என் இரவு அவருடைய இரவுக்குச் சமமாக இருக்க வேண்டும் என்று நான் விரும்பவில்லை" அதாவது கூலியில்.
7- அவர்களைத் தொடர்பு கொள்ளுதல், அவர்களைக் காணச் செல்லுதல் மற்றும் அவர்களுடன் தவறாமல் தொடர்பில் இருப்பது.
8- தேவைப்படும்போது, அவர்களுக்குக் கல்வி ரீதியாக உதவுதல். எனது நண்பர் ஒருவர், தனது பெற்றோருக்கு தொழில்நுட்பத்தில் உள்ள ஒவ்வொரு புதிய விஷயத்தையும் விளக்கிக்கொண்டே இருப்பார். இதுவும் அவர்களுக்கு செய்யும் ஒரு நல்லுதவியாகும்.
9- உங்களை மகிழ்விக்க அவர்கள் செய்யும் முயற்சிகளுக்காக அவர்களுக்கு நன்றி தெரிவித்தல் அல்லது உங்கள் குழந்தைகளை வளர்ப்பதில் அவர்களை ஈடுபடுத்துதல்.
10- அவர்கள் இறந்த பிறகும், தர்மம் செய்தல், பிரார்த்தனை செய்தல், நல்ல செயல்கள் செய்தல், அவர்கள் மீது களங்கம் ஏற்படாதவாறு பார்த்துக்கொள்ளுதல், அவர்களது விருப்பப்படி நடத்தல் மற்றும் அவர்களின் நண்பர்களுடன் நட்புக் கொள்ளுதல் ஆகியவற்றின் மூலம் அவர்களுக்கு நல்லுதவி செய்தல். சுஃபியான் பின் உயைனா (ரஹ்) கூறுகிறார்: "எனக்கும், உன் பெற்றோருக்கும் நன்றி செலுத்து" என்ற அல்லாஹ்வின் வசனத்தைப் பற்றிக் கூறுகையில், ஐந்து நேரத் தொழுகைகளை தொழுபவன் அல்லாஹ்வுக்கு நன்றி செலுத்துகிறான். பெற்றோர் இறந்த பிறகு, அவர்களுக்காக பிரார்த்திப்பவன், அவர்களுக்கு நன்றி செலுத்துகிறான்.
11- அவர்களின் கடன்களை அடைப்பது அல்லது அவர்களின் முதலீடுகளைப் பாதுகாப்பது.
கீழ்ப்படியாமையின் அறிகுறிகளும் உள்ளன. அவை:
1- அவர்களை விட்டு விலகிச் செல்வது, அவர்களுடன் தொடர்பு கொள்ளாமல் இருப்பது மற்றும் அவர்களைத் தவிர்ப்பது.:
2. வார்த்தைகளால் அவர்களைத் துன்புறுத்துவது, வார்த்தைகளால் அல்லது செயலால் அவர்களை இழிவுபடுத்துவது மற்றும் அவர்களைத் துக்கப்படுத்துவது. அலீ (ரலி) கூறுகிறார்: "யார் தனது பெற்றோரைத் துயரப்படுத்துகிறாரோ, அவர் அவர்களுக்குக் கீழ்ப்படியாமல் நடந்துகொள்கிறார்."
3- அவர்களின் தேவைகளைப் புறக்கணித்தல் மற்றும் அவர்களின் கோரிக்கைகளுக்குப் பதிலளிக்காதது.
4- அவர்களின் தேவைகளைப் புறக்கணிப்பது மற்றும் அவர்களின் கோரிக்கைகளுக்குப் பதிலளிக்காமல் இருப்பது.
5- அவர்களுக்கு முன்னால் சத்தத்தை உயர்த்துவது, 'சீ' என்று சொல்வது அல்லது கண் சிமிட்டுவது மற்றும் கிண்டல் செய்வது.
6-அவர்களின் கருத்துக்களை மரியாதையற்ற முறையில் எதிர்ப்பது மற்றும் இழிவான அல்லது அவமதிக்கும் வார்த்தைகளைப் பயன்படுத்துவது.
7- அவர்களுக்காகப் பிரார்த்தனை செய்யாமல் இருப்பது.
8- அவர்களுக்காகத் தியாகம் செய்யாமல் இருப்பது மற்றும் அவர்களின் தேவைகளை விடத் தனது தேவைகளுக்கு முன்னுரிமை கொடுப்பது.
9- அவர்களைப் புறக்கணிப்பது மற்றும் அவர்களைப் பற்றி விசாரிக்காமல் இருப்பது.
10- அவர்களிடம் பொய் சொல்வது, அவர்களை கேலி செய்வது மற்றும் அவர்களைத் திட்டுவது.
11- நண்பர்கள் அல்லது மக்கள் முன் பெற்றோரை நிந்திப்பது மற்றும் அவர்களைப் பற்றித் தவறாகப் பேசுவது.
12- அவர்கள் முன்னால், குறிப்பாகச் சகோதரர்களுக்கு இடையில், சிக்கல்களை உருவாக்குவது.
13- பெற்றோரை விட, மனைவி மற்றும் குழந்தைகளுக்குக் கீழ்ப்படிதல்.
14- அவர்கள் இறந்து போக வேண்டும் என்று விரும்புவது.
15- அவர்களை முதியோர் இல்லங்களில் விட்டுவிடுவது மற்றும் அவர்களைப் பராமரிக்காமல் இருப்பது.
16- பேசும்போது உட்காரும் விதம் அல்லது கண்களின் பார்வை மூலம் அவர்களை மதிக்காமல் இருப்பது.
கீழ்ப்படியாமை என்பது ஒரு பெரும் பாவமாகும். இதிலிருந்து தவ்பா செய்வது கட்டாயமாகும். அலீ பின் அபீ தாலிப் (ரலி) கூறுகிறார்: "லுக்மான் அத்தியாயத்தைப் படித்த பிறகும், பகுத்தறிவு உள்ள ஒருவன் தன் பெற்றோருக்குக் கீழ்ப்படியாமல் இருப்பது ஆச்சரியமாக உள்ளது. ஏனெனில், அல்லாஹ் பெற்றோரைத் தன்னுடன் இணைத்துக் கூறியுள்ளான்." அல்லாஹ் கூறுகிறான்: "மனிதன் தன் பெற்றோருக்கு நன்மை செய்யும்படி நாம் அவனுக்கு உபதேசித்தோம். அச்சமயம் அவனது தாய், பலவீனம் மீது பலவீனத்துடன் (கருவில்) சுமந்தாள். மேலும், அவனை (பாலூட்டி) விலக்குவதும் இரண்டு ஆண்டுகளில்தான். (அப்போது நாம் சொன்னோம்:) 'எனக்கும் உன் பெற்றோருக்கும் நன்றி செலுத்துவாயாக! (இறுதியில்) என்னிடமே நீங்கள் திரும்பி வர வேண்டியுள்ளது.'" (லுக்மான்:14)
பெற்றோரின் நிலை அல்லாஹ்விடம் மிகவும் உயர்ந்ததாகும். அதனால்தான், அல்லாஹ் அவர்களைத் தன்னுடன் இணைத்துக் கூறியுள்ளான். ஒரு கவிஞன் கூறியது போல், "என் தந்தையின் கண்கள் வழியாகவே, இவ்வுலகத்தைப் பார்க்கிறேன்; என் தாயின் தொடுகை வழியே, வாழ்க்கையின் வெப்பத்தை உணர்கிறேன்."
இவைதான், நல்ல மகன்/மகள் (பர்) மற்றும் கீழ்ப்படியாமை (உக்கூக்) ஆகியவற்றின் அறிகுறிகள். இவற்றின் மூலம், ஒவ்வொருவரும் தங்களை மதிப்பீடு செய்து, தாங்கள் பெற்றோருக்கு செய்யும் நல்லுதவியில் எந்த நிலையில் இருக்கிறார் என்பதை அறிய முடியும்.
(அரபு மூலம்: கலாநிதி ஜாஸிம் அல் முதவ்வஃ. தமிழ் வடிவம்: கலாநிதி ஏ. பீ. எம். அப்பாஸ்)
